الحالة صبحت شينة.. صعبة علينا!!!
– حاجة آمنة صبرت وجبرت.. كبروا العيال وازالوا الغبار.
– والهلال (كبر) وما صبر وماجبر.. وغباره كتاحه ما في زول بزيله.
– (96) مشاركات ووصول دون حصول.. (صفر) ثابت وراسخ لا بطولة قارية ولا إقليمية.
– حالة شينة وصعبة.. وصفر زايد دلال وأعوام.
– علاقة عكسية كل ما يكبر (الصفر) يصغر الهلال.
– فازت النهضة وانفجر البركان في الهلال.
– حممه كشفت ثقوب الثوب الإداري في الهلال وضعف تركيبته وهوانه.
– الرشيد علي عمر قال السوباط ما عارف المطرة صابة وين.
– مطر بدون براق.. وشويعر من غير شعر.
– وأنه لا يستطيع ذكر خمسة من أسماء لاعبى الهلال.
– وأنه لا يميز بين نهضة بركان والعصمة الكاملين.. (مفرمط).
– الرشيد وصف العليقي بالمسطح والمغرور.. وترك الحبل على الغارب للمدرب.
– والمدرب أكبر ماسورة.
– وعنده رأي في فلومو لأنه طريقة شربه للشاي لا تعجبه.- (بشفط) الشاي بنغمة رنين عالية.
– ريجي ما بحب النغمات بحولك التلاجة طوالي.
– تمضغ الأكل بنغمة بمرقك من التشكيلة.
– تشفط الشاي ولا العصير بتمرق من القائمة الرئيسية.
– تلوك لبانة بخصم منك.
– عنده وسواس من الأصوات.
– عايزه يرضى عنك تشتغل هزاز أو صامت (زي أرنق).
– أو تستعين بخبراء في لغة الإشارة.
– هزيمة الهلال وخروجه ممكن تكون بسبب الشفاطين..(شتتوا تركيز ريجي )
– خربوا مود ريجى بالتشفيط غير المقنن.
– ما يهمنا أن نهضة بركان فضحت الحمام (وطيرت أكياس كتيرة).
– العليقي اعتزل.
– وريجى في الباى باى.
– كوليبالى والجان قالوا ما عايزين (يا تفسخوا انتو يا نفسخ نحنا).
– فوفانا قنع من دولاراته وفك البيرق.
– فلومو طلب تسويق أو إعارته.
– والقائمة طويلة .
– بس قبل ذلك ضروري ننبه السوباط ديل محترفي الهلال والمدرب ما بعثة يوناميد.
– الغريبة محمد عبدالماجد قال حضور السوباط بطائرة خاصة ساهم في طمأنة جماهير الهلال.
– والنتيجة أكدت وجود خلل (قد يكون في لاعبي الهلال او السوباط واحتمال كبير في الطمأنينة نفسها).
– صرف (200) ألف دولار على الطمأنينة (دي عايزة لجنة إزالة التمكين).
– والغريب لا لموا في الطمأنينة ولا النتيجة ولا السوباط نفسه.
– والغريب أن يغلقوا ملف الأبطال ويفتحوا ملف الجمعية العمومية.
– زمان كان بفتحوا ملف النخبة.
– بس واضح أن السوباط لم يعد يتحمل وجود العليقي وعايز يتخلص منه.
– رئيس ما بيعرف خمسة من لاعبي فريقه ومصر على الكنكشة.
– والعليقي زي الكاردينال قال الفول فولي.. وما في زول بدفع غيري .
– المهم عجاجة الهلال في السماء.
– البركان كشف الحال وفضح المستور.
– قوون ناااار فرتق الإدارة صامولة صامولة.. وشلع الفريق.
– شلعوها المغاربة.
– شويعر أخطر من الصواريخ البالستية.
– ما يهمنا أن الصفر في مكانه.. زاد سنة.. وتفصله عن المئة أربع مشاركات.
– أربع سنوات ويقفل قرن كامل.
– قرنه ما كن.
– بعد كلام الرشيد علي عمر: يا ربي السوباط عارف الهلال طار من الأبطال.
– ما يكون قايل المباراة في الدوري الرواندي.
– نادي رئيسه مفرط ومدربه مغرور والرجل الأول مسطح.. وبعد ده بحلموا بالأبطال !!.
– غيروا اعدادات الاداريين اولا ..
– *لانه واضح فى زول لعب فى الاعدادات .
– ويحق لنا أن نسأل الرشيد الجماهير ح تحاسب منو إذا كان المسؤولين خارج الخدمة ومفرمطين.
– ما علينا المهم الطيران ثابت ثبات الصفر.
– هلا 96.
